Blog

ຈາກຜູ້ໃຊ້ເຟສບຸກ MouNoy Saiyasone ໄດ້ໂພສໃນ ວັນທີ 8 ກຸມພາ 2022 ເວລາປະມານ 08:30 ນາທີ ໂດຍລະບຸຂໍ້ຄວາມໃນໂພສວ່າ: ພົບລຸກບົ່ມ ຢູ່ກາງທາງໜ້າເຮືອນຕົນ ຊຶ່ງທຳອິດຄິດວ່າແມ່ນກ້ອນຫີນ ຊຶ່ງເຫັນເປັນລັກສະນະແປກໆ ຈຶ່ງໄດ້ເຂົ້າໄປເບິ່ງ ປະກົດວ່າ ມັນແມ່ນລູກບົ່ມບີ ທີ່ຍັງບໍ່ທັນແຕກ (ຫຼັງຈາກກວດສອບພາຍຫຼັງຈື່ງຮູ້).

ຈາກຂໍ້ມູນໄດ້ລະບຸອີກວ່າ ເສັ້ນທາງນີຫາກໍ່ຖົມດິນໃໝ່ ຊຶ່ງໝາກບົ່ມບີນີ້ອາດມານຳດິນທີ່ນຳມາຖົມ ຈຸດພິກັດແມ່ນ ບ້ານໜອງກາລິ ເມືອງປາກຊ່ອງ ແຂວງຈຳປາສັກ.

ສຳລັບບໍລິສັດໃດທີ່ຂຸດດິນມາຖົມກໍໃຫ້ທາງພາກສ່ວນຮັບຜິດຊອບສະເພາະດ້ານເຂົ້າໄປກວດສອບພື້ນທີເພີ່ມຕື່ມ ສ່ວນລະເບີດລູກນີ້ແມ່ນເກັບກູ້ໄປແລ້ວເດີ.

 

ວັນທີ 8 ກຸມພາ 2022 ນີ້, ທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປະທານປະເທດແຫ່ງ ສປປ ລາວ ພ້ອມດ້ວຍພັນລະຍາ ແລະ ຄະນະໄດ້ເດີນທາງມາເຄື່ອນໄຫວຢຽມຢາມ ແລະ ເຮັດວຽກຢູ່ແຂວງຜົ້ງສາລີ. ໂອກາດນີ້ກໍ່ໄດ້ຮັບການຕ້ອນຮັບຈາກທ່ານ ຄຳຜອຍ ວັນນະສານ ກຳມະການສູນກາງພັກ, ເລຂາພັກແຂວງ, ເຈົ້າແຂວງໆຜົ້ງສາລີ, ພ້ອມດ້ວຍການນຳພັກລັດຂັ້ນແຂວງ ຢູ່ທີ່ສະໜາມບີນຂອງເມືອງຜົ້ງສາລີ.

ຈຸດປະສົງຫຼັກຂອງການມາເຄື່ອນໄຫວໃນຄັ້ງນີ່ ກໍ່ເພື່ອເປັນການຢ້ຽມຢາມ ແລະ ຕິດຕາມຊຸກຍູ້ການຈັດຕັ້ງປະຕິບັດມະຕິ XI ຂອງພັກ, ມະຕິ XI ຂອງແຂວງ ແລະ ແຜນພັດທະນາເສດຖະກິດ – ສັງຄົມຂອງແຂວງ, ທັງພົບປະໂອ້ລົມການນຳຫຼັກແຫລ່ງຂອງແຂວງຜົ້ງສາລີ, ພ້ອມກັນນັ້ນທ່ານປະທານປະເທດພ້ອມດ້ວຍຄະນະຍັງຈະໄດ້ໄປເຄື່ອນໄຫວຢ້ຽມຊົມພື້ນຖານການຜະລິດ ໂດຍສະເພາະກໍ່ແມ່ນໂຮງງານເຫຼົ້າຂຽວຂຸນສຸກ ແລະ ໂຮງງານຊາບູຮານແສງຄຳ ລາວລີ ແລະ ສວນຊາຢູ່ບ້ານລຸງຈີງ ແລະ ມອບເຄື່ອງຈຳນວນໝື່ງໃຫ້ກັບ ໂຮງຮຽນ ມສ ພູຟ້າ ແລະ ໂຮງຮຽນ ມ ສ ມົງເຈົາ ຕື່ມອີກ.

ການເຄື່ອນໄຫວຢ້ຽມຢາມ ແລະ ເຮັດວຽກຂອງທ່ານປະທານປະເທດແຫ່ງ ສປປ ລາວພ້ອມດ້ວຍພັນລະຍາ ແລະ ຄະນະ ຢູ່ແຂວງຜົ້ງສາລີ ແມ່ນຈະດຳເນີນຮອດວັນທີ 9 ກຸມພາ 2022 ຈຶ່ງຈະສຳເລັດ.

ພາບ – ຂ່າວ: ແສງຄຳ ສາລີວັນ

ວັດປ່າພະບາດພູເຂົາຄວາຍ ວັດສັກສິດທີ່ຕັ້ງຢູ່ກາງພູເຂົາ ໃຊ້ເວລາເດີນທາງຈາກວົງວຽນດອນໜູນ, ນະຄອນຫຼວງວຽງຈັນ ພຽງແຕ່ 1ຊົ່ວໂມງເຄິ່ງ, ເພື່ອໄປເຮັດບຸນຂໍພອນ, ເຈີມຝາມື ແລະ ໄປເບິ່ງຮູບປັ້ນພະພຸດທະເຈົ້າ ແລະ ຜີນາລົກ.

.

1 ເລີ່ມຈາກວົງວຽນດອນໜູນ ຂີ່ໄປຕາມເສັ້ນທາງທ່າງ່ອນ, ຂ້າມຂົວທ່າງ່ອນ, ໄປຕາມເສັ້ນທາງໄປບ້ານເກິນ.
2 ລະຫວ່າງທາງໄປເຮົາກໍຈະເຫັນເຈດີວັດພະພຸດທະເຈົ້າໂຄຕະມະ ທີ່ຕັ້ງຢູ່ໃກຈາກຫົນທາງແຕ່ກໍແນມເຫັນ, ພວກເຮົາເລີຍລ້ຽວລົດກັບເພື່ອເຂົ້າໄປເບິ່ງ ປາກົດວ່າ: ເຂົ້າໄປດ້ານໃນວັດ ເຈດີແມ່ນງາມຫຼາຍ ສະຖານທີ່ແມ່ນ: ບ້ານນາຂຸນຂຽນ, ເມືອງໄຊທານີ, ນະຄອນຫຼວງວຽງຈັນ. ຊື່ເຕັມຂອງວັດແມ່ນ: ວັດພຣະສາດສະດາສັມມາສັມພຸດທະເຈົ້າສິດທະຖະພຸດທະໂຄຕະມະ.

3 ຫຼັງຈາກນັ້ນເຮົາອອກເດີນທາງຕໍ່ ເພື່ອໄປວັດປ່າພະບາດພູເຂົາຄວາຍ, ຂີ່ໄປຕາມທາງຈະເຫັນປະຕູໂຂງວັດ ທີ່ຊີ້ບອກທາງໄປ, ຂີ່ເຂົ້າໄປເລື້ອຍໆຈະຜ່ານບ້ານຄົນ, ປ່າ ແລະ ຟາມຕ່າງໆ ປະມານ 5ກິໂລແມັດ ຈາກປະຕູໂຂງ ເຮົາກໍຈະເຫັນທາງເຂົ້າວັດ ຫຼືປະຕູໂຂງອັນທີສອງ.
4 ເມື່ອຮອດປະໂຕໂຂງທີສອງແລ້ວ ລ້ຽວຂວາຕາມທາງຄອນກີດໄປເຮົາກໍຈະໄປສູ່ບໍລິເວນຮອຍພະບາດ ໄປກາບຂໍພອນ, ເຮັດບຸນ ແລະ ຍ່າງຂຶ້ນໄປບໍລິເວນພຣະພຸດທະຮູບໃຫຍ່ຢູ່ດ້ານເທິງເພື່ອຂໍພອນກໍໄດ້ເຊັ່ນກັນ, ໝາຍເຫດ: ຜູ້ຍິງບໍ່ສາມາດໃສ່ໂສ້ງເຂົ້າໄປດ້ານໃນຂອງຮອຍພະບາດໄດ້ ແຕ່ຢູ່ດ້ານໜ້າກໍມີສິ້ນໃຫ້ໃສ່ ເຊິ່ງເຮົາສາມາດບໍລິຈາກລົງຕູ້ບໍລິຈາກໄດ້ເລີຍ.

.

5 ຫຼັງຈາກທີ່ຂໍພອນແລ້ວ ເຮົາກໍກັບຄືນມາທາງເຂົ້າອີກເທື່ອໜຶ່ງ ຫຼືປະຕູໂຂງທີສອງ ແລ້ວລ້ຽວຊ້າຍໄປຕາມກຳແພງວັດເລື້ອຍໆ ເຮົາຈະປະກົດເຫັນຮູບປັ້ນພະທີ່ຕັ້ງຢູ່ດ້ານເທີງພູຢ່າງຫຼວງຫຼາຍ, ສວຍງາມ ແລະ ມີຄວາມສັກສິດຫຼາຍ.
6 ຫຼັງຈາກນັ້ນຂີ່ໄປອີກໜ້ອຍໜຶ່ງເຮົາກໍຈະພົບບໍລິເວນທີ່ເປັນນາລົກ ແລະ ສະຫວັນ ທີ່ມີຮູບປັ້ນຜີຕ່າງໆໃນນາລົກ ແລະ ພະພຸດທະເຈົ້າຫຼາຍໆອົງ (ໃນສ່ວນນີ້ພວກເຮົາບໍ່ຈື່ຊື່ວ່າບໍລິເວນນັ້ນເພິ່ນເອີ້ນວ່າວັດຫຍັງ).

ຍ່າງຕໍ່ໄປອີກໜ້ອຍໜຶ່ງເຮົາກໍຈະໄປເຮັດບຸນ ທານປັດໄຈ ແລ້ວ ຂໍເຈີມຝາມື, ເຈີມໂທລະສັບຕ່າງໆ ນຳປູ່ຜ້າຂາວ (ສາມາດສອບຖາມນຳຄົນແຖວນັ້ນໄດ້ເລີຍວ່າກຸດເພິ່ນຢູ່ບ່ອນໃດ) ເພື່ອຄວາມເປັນສິຣິມົງຄຸນໃຫ້ຕົວເອງ (ນີ້ແມ່ນຄວາມເຊື່ອສ່ວນບຸກຄົນເດີ້).
7 ພໍແຕ່ເຮັດບຸນຂໍພອນແລ້ວ ເຮົາກໍເດີນທາງກັບ ແລະ ແວ່ອຸດໜຸນສິນຄ້າຂອງປະຊາຊົນແຖວນັ້ນທີ່ຂາຍຢູ່ລະຫວ່າງທາງ.

ຈາກ: ເພຈກິນແລະທ່ຽວ

ໄລຍະຕົ້ນໃນເດືອນທັນວາ 2021 ຫາ ຕົ້ນເດືອນມັງກອນ 2022 ເຈົ້າກນ້າທີ່ ປກສ ເມືອງທູລະຄົມ ແຂວງວຽງຈັນ ມ້າງກຸ່ມ ແງລັກລົດຈັກ 3 ກຸ່ມ ຜູ້ຖືກຫາ 6 ຄົນ ເກັບກູ້ໄດ້ລົດຈັກ 5 ຄົນ.

ເຈົ້າຫນ້າທີ່ ເປີດເຜີຍວ່າ “ໄດ້ຕິດຕາມເປົ້າຫມາຍ ລັ ກ ຊັບມາໄດ້ໄລຍະຫນຶ່ງຈຶ່ງສາມາດກັກຕົວກຸ່ມລັກລົດຈັກໄດ້ 3 ກຸ່ມ ແລະ ເກັບກູ້ລົດຈັກໄດ້ຄືນ 5 ຄັນ, ໃນນັ້ນມີລົດຈັກ HONDA WAVE 4 ຄັນ, SUZUKI Smash 2 ຄັນ, ເຊິ່ງເປັນລົດຂອງປະຊາຊົນບ້ານນໍ້າຫຍາມ, ປະຊາຊົນບ້ານນາໝາກ, ພະນັກງານຄູ ແລະ ຊາວໜຸ່ມບ້ານວັງເຮືອ, ລົດຂອງພະນັກງານຢູ່ບ້ານໂພນເງິນ ເມືອງໂພນໂຮງ ແຂວງວຽງຈັນ.”

ປັດຈຸບັນ, ເຈົ້າໜ້າທີ່ພະແນກຕໍາຫລວດຂອງກອງບັນຊາການ ປກສ ເມືອງທຸລະຄົມ ກໍາລັງດໍາເນີນການສືບສວນ-ສອບສວນ ເພື່ອຂະຫຍາຍຜົນເກັບກໍາລາຍລະ ອຽດກັບພວກກ່ຽວຕື່ມ.

ພາບ-ຂໍ້ມູນ: ປກສ ເມືອງທຸລະຄົມ

ກະຊວງແຜນການ ແລະ ການລົງທຶນ ຕາງໜ້າລັດຖະບານລາວ ຮ່ວມກັບ ບໍລິສັດ CTC Development ກຼູບ ແລະ ບໍລິສັດ Vu Thu Construction Joint Stock Company (ສສ ຫວຽດນາມ) ໄດ້ຈັດພິທີເຊັນບົດບັນທຶກຄວາມເຂົ້າໃຈ (MOU) ເພື່ອສຶກສາຄວາມເປັນໄປໄດ້ໂຄງການສາຍສົ່ງໄຟຟ້າແຮງດັນ 220 ກິໂລໂວນ ຈາກເຂື່ອນນໍ້າອູ 3,4,5,6 ແລະ 7 ນີ້ ຜ່ານແຂວງຫຼວງພະບາງ ແລະ ແຂວງຜົ້ງສາລີ ອອກສູ່ຊາຍແດນ ສສ ຫວຽດນາມ ຕາມສັນຍາຈະໃຫ້ໄດ້ຄຳຕອບພາຍ 18 ເດືອນ.

ໃນວັນທີ 4 ກຸມພາ 2022 ໄດ້ຈັດພິທີເຊັນບົດບັນທຶກຄວາມເຂົ້າໃຈ (MOU) ເພື່ອສຶກສາຄວາມເປັນໄປໄດ້ໂຄງການສາຍສົ່ງໄຟຟ້າແຮງດັນ 220 ກິໂລໂວນ ຈາກເຂື່ອນນໍ້າອູ 3,4,5,6 ແລະ 7 ນີ້ ຜ່ານແຂວງຫຼວງພະບາງ ແລະ ແຂວງຜົ້ງສາລີ ອອກສູ່ຊາຍແດນ ສສ ຫວຽດນາມ ໂດຍການເຂົ້າຮ່ວມຂອງທ່ານ ນາງ ຄຳຈັນ ວົງແສນບຸນ ຮອງລັດຖະມົນຕີກະຊວງແຜນການ ແລະ ການລົງທຶນ, ທ່ານ ສີນາວາ ສຸພານຸວົງ ຮອງລັດຖະມົນຕີກະຊວງພະລັງງານ ແລະ ບໍ່ແຮ່, ທ່ານ ຈັນທອນ ຈັນທະສະຫວັດ ປະທານບໍລິສັດ CTC Development ກຼູບ, ພ້ອມພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານ.

ທ່ານ ບຸນຖົມ ລໍມະນີ ປະທານທີ່ປຶກສາ ບໍລິສັດ CTC Development ກຼູບກ່າວວ່າ: ບໍລິສັດ CTC Development ກຼູບ ແລະ ບໍລິສັດ Vu Thu Construction Joint Stock Company (ສສ ຫວຽດນາມ) ແມ່ນເປັນບໍລິສັດເອກະຊົນທັງ 2 ແລະ ໄດ້ຮ່ວມທຸລະກິດຮ່ວມກັນມາດົນນານ, ການເຊັນບົດ ບັນທຶກຄວາມເຂົ້າໃຈ (MOU) ເພື່ອສຶກສາຄວາມເປັນໄປໄດ້ ໂຄງການສາຍສົ່ງໄຟຟ້າແຮງດັນ 220 ກິໂລໂວນ ຄັ້ງນີ້ແມ່ນເປັນນິມິດໝາຍສຳຄັນ ຂອງ 2 ບໍລິສັດ ແລະ ແມ່ນໝາກຜົນສຳເລັດຕົວຈິງເບື້ອງຕົ້ນທີ່ໄດ້ມີການທົບທວນການເຈລະຈາມາດົນ, ເຊິ່ງຜົນສຳເລັດຄັ້ງນີ້ແມ່ນຍ້ອນການໄດ້ຮັບການສະໜັບສະໜູນຈາກບັນຄະນະນຳ ຈາກຂະແໜງການກ່ຽວຂ້ອງຈົນເຖິງມື້ນີ້. ໂຄງກງານສຶກສາສ້າງສາຍສົ່ງແຮງດັນ 220 ກິໂລໂວນ ຈາກເຂື່ອນນໍ້າອູ 3,4,5,6 ແລະ 7 ນີ້ ແມ່ນຜ່ານແຂວງຫຼວງພະບາງ ແລະ ແຂວງຜົ້ງສາລີ ແມ່ນມີກຳນົດໄລຍະເວລາການສຶກສາອອກແບບ 18 ເດືອນ.

ທ່ານກ່າວຕື່ມວ່າ: ເຖິງຈະເປັນໄລຍະເວລາທີ່ສັ້ນພວກຂ້າພະເຈົ້າຈະພະຍາຍາມສູ້ຊົນປະຕິບັດຕາມກຳນົດເວລາໃຫ້ໄດ້ ເນື່ອງຈາກທາງ 2 ບໍລິສັດ ແມ່ນມີຄວາມພ້ອມທາງດ້ານທຶນຮອນ, ເຕັກນິກວິຊາການ ແລະ ແຮງງານທຸກດ້ານ ເຊິ່ງລັກສະການສຳຫຼວດນີ້ຈະມີການອອກແບບສາຍສົ່ງໄຟຟ້າແບບແຈກບໍ່ຈຳກັດ ເພື່ອເປັນໂອກາດໃຫ້ບໍລິສັດໄດ້ນໍາໃຊ້ໄດ້, ຂ້າພະເຈົ້າເຊື່ອວ່າຫາກຜົນການສຶກສາສຳເລັດສຳເລັດ ແລະ ຫາກໄດ້ຈັດຕັ້ງປະຕິບັດການກໍ່ສ້າງສາຍສົ່ງໄປສູ່ຊາຍແດນ ສສ ຫວຽດນາມ ຄິດວ່າຈະເກີດຜົນປະໂຫຍດໃຫ້ລໍ້າຄ່າມາໃຫ້ ສປປ ລາວ ໂດຍສະເພາະການສ້າງລາຍໄດ້ເຂົ້າປະເທດ.

ເຊິ່ງການເຊັນລົງນາມຄັ້ງນີ້ຝ່າຍລັດຖະບານ ສປປ ລາວ ໂດຍທ່ານ ນາງ ຄຳຈັນ ວົງແສນບຸນ ຮອງລັດຖະມົນຕີກະຊວງແຜນການ ແລະ ການລົງທຶນ, ໂດຍການເຊັນເປັນສັກຂີພິຍານຂອງທ່ານ ສີນາວາ ສຸພານຸວົງ ຮອງລັດຖະມົນຕີ ກະຊວງພະລັງງານ ແລະ ບໍ່ແຮ່, ທ່ານ ທອງສຸກ ເປົາສຸລີ ຫົວໜ້າພະແນກແຜນການ ແລະ ການລົງທຶນແຂວງຜົ້ງສາລີ, ທ່ານ ບຸນເພັງ ວິລະວົງສາ ຮອງຫົວໜ້າພະແນກແຜນການ ແລະ ການລົງທຶນແຂວງຫຼວງພະບາງ ກັບຝ່າຍບໍລິສັດແມ່ນການລົງນາມຂອງ ທ່ານ ຈັນທອນ ຈັນທະສະຫວັດ ປະທານບໍລິສັດ CTC Development ກຼູບ, ໂດຍການເຊັນເປັນພິຍານຂອງທ່ານ ຟາມກວາງຈຸງ Pham Quang Trung ປະທານ ບໍລິສັດ Vu Thu Construction Joint Stock Company (ສສ ຫວຽດນາມ), ທ່ານ ບຸນຖົມ ລໍມະນີ ປະທານທີ່ປຶກສາ ບໍລິສັດ CTC Development ກຼູບ, ທ່ານ ຫງວຽນ ແທ່ງຮາຍ Nguyen Thanh Hai ຄະນະທີ່ປຶກສາ ປະທານ ບໍລິສັດ Vu Thu Construction Joint Stock Company (ສສ ຫວຽດນາມ).

ໃນຕອນເຊົ້າວັນທີ 4 ກຸມພາ 2022 ນີ້, ຄະນະພົວພັນຕ່າງປະເທດສູນກາງພັກ ຈັດພິທີປະກາດແຕ່ງຕັ້ງ ຮອງຫົວໜ້າຄະນະພົວພັນຕ່າງປະເທດສູນກາງພັກ ໂດຍໃຫ້ກຽດເປັນປະທານຂອງ ສະຫາຍ ທອງສະຫວັນ ພົມວິຫານ ກໍາມະການສູນກາງພັກ, ເລຂາຄະນະພັກ, ຫົວໜ້າຄະນະພົວພັນຕ່າງປະເທດສູນກາງພັກ ມີຄະນະພັກ, ຕາງໜ້າກົມຈັດຕັ້ງ-ພະນັກງານ ຄະນະຈັດຕັ້ງສູນກາງພັກ, ຄະນະກົມ ແລະ ພະນັກງານຫລັກແຫລ່ງໃນຄະນະພົວພັນຕ່າງປະເທດສູນກາງພັກເຂົ້າຮ່ວມ.

ໃນພິທີ, ຕາງໜ້າກົມຈັດຕັ້ງ-ພະນັກງານ ຄະນະຈັດຕັ້ງສູນກາງພັກ ໄດ້ຜ່ານຄຳສັ່ງຂອງຄະນະເລຂາທິການສູນກາງພັກ ເລກທີ 15/ຄລສພ, ລົງວັນທີ 25/01/2022 ວ່າດ້ວຍການຍົກຍ້າຍພະນັກງານໄປຮັບໜ້າທີ່ໃໝ່ ແລະ ມະຕິຕົກລົງຂອງຄະນະເລຂາ ທິການສູນກາງພັກ ເລກທີ 16/ຄລສພ, ລົງວັນທີ 25/01/2022 ວ່າດ້ວຍການບົ່ງຕົວແຕ່ງຕັ້ງ ສະຫາຍ ວາລະໄຊ ເລັ່ງສະຫວັດ ກໍາມະການຄະນະພັກ, ກະຊວງອຸດສາຫະກໍາ ແລະ ການຄ້າ ມາເປັນ ກໍາມະການຄະນະພັກ, ຮອງຫົວໜ້າຄະນະພົວພັນຕ່າງປະ ເທດສູນກາງພັກ.

ໂອກາດນີ້, ສະຫາຍ ທອງສະຫວັນ ພົມວິຫານ ໄດ້ມີຄໍາເຫັນໂອ້ລົມ ໂດຍໄດ້ສະແດງຄວາມຍ້ອງຍໍຊົມເຊີຍຕໍ່ ສະຫາຍຮອງຫົວໜ້າຄະນະພົວພັນຕ່າງປະເທດສູນກາງພັກ ຜູ້ໃໝ່ ທີ່ໄດ້ຮັບການບົ່ງຕົວແຕ່ງຕັ້ງໃນຄັ້ງນີ້, ເຊິ່ງຈະເປັນກໍາລັງແຮງປະກອບສ່ວນສໍາຄັນເຂົ້າໃນການນໍາພາ-ຊີ້ນໍາ ວຽກງານຂອງ ຄະນະພົວພັນຕ່າງປະເທດສູນກາງພັກ ໃຫ້ນັບມື້ນັບເຂັ້ມແຂງຂຶ້ນ. ພ້ອມນັ້ນ, ຍັງຮຽກຮ້ອງໃຫ້ພະນັກງານຫລັກແຫລ່ງຂອງຄະນະພົວພັນຕ່າງປະເທດສູນກາງພັກ ຈົ່ງພັດທະນາຕົນເອງໃຫ້ມີຄວາມໜັກແໜ້ນ, ຍົກສູງຄວາມເປັນແບບຢ່າງນໍາໜ້າ ທາງດ້ານຄຸນທາດການເມືອງ, ຄຸນສົມບັດສິນທໍາປະຕິວັດ, ແບບແຜນການນໍາພາ, ຄວາມເສຍສະຫລະເພື່ອສ່ວນລວມ, ມີຄວາມສາມັກຄີເປັນເອກະພາບ, ເດັດດຽວສະກັດກັ້ນ ແລະ ຕ້ານປະກົດການຫຍໍ້ທໍ້ຕ່າງໆ.

ໃຫ້ເຊີດຊູຄວາມເປັນແບບຢ່າງໃນການນໍາພາ-ຊີ້ນໍາ ແລະ ປະຕິບັດໜ້າທີ່ວຽກງານໃນຂະແໜງການຕ່າງປະ ເທດຂອງພັກ ຢ່າງມີປະສິດທິພາບ, ສືບຕໍ່ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ II ຂອງອົງຄະນະພັກຄະນະພົວພັນຕ່າງປະເທດສູນກາງພັກ ໃຫ້ປະກົດຜົນເປັນຈິງ ເພື່ອພາລະກິດປົກປັກຮັກສາ ແລະ ສ້າງສາພັດທະ ນາປະເທດຊາດ.
ຫລັງຈາກນັ້ນ, ສະຫາຍ ວາລະໄຊ ເລັ່ງສະຫວັດ ກໍາມະການຄະນະພັກ, ຮອງຫົວໜ້າຄະນະພົວພັນຕ່າງປະເທດສູນກາງພັກ ຜູ້ໃໝ່ ກໍໄດ້ສະແດງຄວາມຂອບໃຈ ແລະ ຮູ້ບຸນຄຸນມາຍັງຂັ້ນເທິງ ແລະ ການຈັດຕັ້ງພັກ-ລັດ ທີ່ໄດ້ໃຫ້ຄວາມໄວ້ວາງໃຈ ແລະ ໃຫ້ຄຳໝັ້ນສັນຍາວ່າ ຈະປະກອບສ່ວນຢ່າງຕັ້ງໜ້າໃນການນຳພາ-ຊີ້ນໍາວຽກງານຂອງຄະນະພົວພັນຕ່າງປະເທດສູນກາງພັກ ໃນການເປັນເສນາທິການດ້ານວຽກງານຕ່າງປະເທດຂອງພັກ ໃຫ້ນັບມື້ເຕີບໃຫຍ່ເຂັ້ມແຂງ ແລະ ມີປະສິດທິຜົນສູງຂຶ້ນ.
ຂ່າວ: ຂປລ

ລັດຖະບານ ໄດ້ຜ່ອນຜັນເງື່ອນໄຂ ແລະ ຫຼຸດໄລຍະເວລາໃນການຈຳກັດບໍລິເວນ ເມື່ອເດີນທາງເຂົ້າມາ ສປປ ລາວ ເຫຼືອ 7 ວັນ, ພ້ອມກຳນົດມາດຕະການອຳນວຍຄວາມສະດວກໃຫ້ແກ່ການຂົນສົ່ງສິນຄ້າເພີ່ມຂຶ້ນ, ຍົກເລີກຂໍ້ຈຳກັດຈຳນວນໜຶ່ງໃນການເຄື່ອນໄຫວ ແລະ ດຳເນີນທຸລະກິດ ຢູ່ພາຍໃນປະເທດ ທີ່ໄດ້ກຳນົດໃນໄລຍະຜ່ານມາ ເພື່ອອຳນວຍຄວາມສະດວກໃຫ້ແກ່ທຸກພາກສ່ວນໃນສັງຄົມ ຫັນມາເຄື່ອນໄຫວດຳລົງຊີວິດແບບໃໝ່ ແລະ ຟື້ນຟູເສດຖະກິດໄດ້ຫຼາຍຂຶ້ນ.

ໃນວັນທີ 3 ກຸມພາ 2022, ທ່ານ ນາງ ທິບພະກອນ ຈັນທະວົງສາ, ຮອງລັດຖະມົນຕີ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ຮອງຫົວໜ້າຄະນະສະເພາະກິດ, ຜູ້ປະຈຳການ ໄດ້ຖະແຫຼງຂ່າວວ່າ: ຫ້ອງວ່າການສຳນັກງານນາຍົກລັດຖະມົນຕີ ໄດ້ອອກແຈ້ງການເລກທີ 130/ຫສນຍ, ລົງວັນທີ 3 ກຸມພາ 2022 ເລື່ອງທິດຊີ້ນຳຂອງກອງປະຊຸມລັດຖະບານ ກ່ຽວກັບມາດຕະການປ້ອງກັນ, ຄວບຄຸມ ແລະ ສະກັນກັ້ນການແຜ່ລະບາດຂອງພະຍາດໂຄວິດ-19 ໃນໄລຍະໃໝ່.

ຊຶ່ງມາດຕະການສ່ວນໃຫຍ່ ແມ່ນໄດ້ມີການຜ່ອນຜັນເຊັ່ນ: ເງື່ອນໄຂ ແລະ ໄລຍະເວລາໃນການຈຳກັດບໍລິເວນ ເມື່ອເດີນທາງເຂົ້າມາ ສປປ ລາວ, ການອຳນວຍຄວາມສະດວກໃຫ້ແກ່ການຂົນສົ່ງສິນຄ້າເພີ່ມຂຶ້ນ, ຍົກເລີກຂໍ້ຈຳກັດຈຳນວນໜຶ່ງ ໃນການເຄື່ອນໄຫວ ແລະ ດຳເນີນທຸລະກິດຢູ່ພາຍໃນປະເທດ ທີ່ໄດ້ກຳນົດໃນໄລຍະຜ່ານມາ ເພື່ອອຳນວຍຄວາມສະດວກ ໃຫ້ແກ່ທຸກພາກສ່ວນໃນສັງຄົມ ຫັນມາເຄື່ອນໄຫວດຳລົງຊີວິດແບບໃໝ່ ແລະ ຟື້ນຟູເສດຖະກິດ ໄດ້ຫຼາຍຂຶ້ນ.

ພ້ອມນີ້ຍັງເຫັນດີດ້ານຫຼັກການໃຫ້ເປີດດ່ານທ້ອງຖິ່ນ ແລະ ດ່ານປະເພນີສໍາລັບຂົນສົ່ງສິນຄ້າ ໂດຍມອບໃຫ້ນະຄອນຫຼວງວຽງຈັນ ແລະ ບັນດາແຂວງ ທີ່ມີຊາຍແດນຕິດກັບຕ່າງປະເທດ ດຳເນີນການກວດກາ ທັງປຶກສາຫາລືກັບທ້ອງຖິ່ນຂອງປະເທດທີ່ມີດ່ານຮ່ວມກັນ ຖ້າເຫັນວ່າມີຄວາມພ້ອມຮອບດ້ານ ລວມທັງສິ່ງອໍານວຍຄວາມສະດວກໃນການຂົນສົ່ງສິນຄ້າ ແລະ ຮັບປະກັນໃນການປ້ອງກັນ ແລະ ຄວບຄຸມການລະບາດ ຂອງພະຍາດໂຄວິດ-19 ທັງມີຄວາມເປັນເອກະພາບກັນສູງແລ້ວ ແມ່ນມອບໃຫ້ອົງການປົກຄອງນະຄອນຫຼວງວຽງຈັນ ແລະ ອົງການປົກຄອງແຂວງ ອະນຸຍາດໃຫ້ເປີດໄດ້.

ວັນທີ 2 ກຸມພາ 2022 ທີ່ ກະຊວງການຕ່າງປະເທດ ໄດ້ມີພິທີລົງນາມ ເພື່ອຮັບເອົາການຊ່ວຍເຫຼືອລ້າ ນອກແຜນ ເຊິ່ງເປັນການຊ່ວຍເຫຼືອຈາກ ລັດຖະບານ ຍີ່ປຸ່ນ ໃນການສ້າງລະບົບ ການແຈ້ງເຕືອນໄພນໍ້າຖ້ວມ ລ່ວງໜ້າ ຢູ່ 6 ແຂວງ ຂອງ ສປປ ລາວ ລວມມູນຄ່າ 1 ຕື້ເຢນ ຫຼື ປະມານ 8,78 ລ້ານໂດລາສະຫະລັດ, ເຊິ່ງຮ່ວມເຊັນສັນຍາກັນລະຫວ່າງ ທ່ານ ໂຄບາຢາຊິ ເຄນອິຈິ (Mr. KOBAYASHI Kenichi), ເອກອັກຄະຣາຊະທູດ ຍີ່ປຸ່ນ ປະຈໍາ ສປປ ລາວ ຕາງໜ້າໃຫ້ ລັດຖະບານ ຍີ່ປຸ່ນ ແລະ ທ່ານ ໂພໄຊ ໄຂຄໍາພິທູນ,

ຮອງລັດຖະມົນຕີ ກະຊວງການຕ່າງປະເທດ ຕາງໜ້າໃຫ້ ລັດຖະບານ ສປປ ລາວ, ພ້ອມດ້ວຍບັນດາພະນັກງານຈາກຂະແໜງການທີ່ກ່ຽວຂ້ອງ ເຂົ້າຮ່ວມ. ສຳລັບ 6 ແຂວງ ທີ່ໄດ້ຮັບການຊ່ວຍເຫຼືອດັ່ງກ່າວ ລວມມີ ແຂວງ ຈໍາປາສັກ, ສາລະວັນ, ສະຫວັນນະເຂດ, ເຊກອງ, ອັດຕະປື ແລະ ແຂວງ ຄໍາມ່ວນ ເຊິ່ງຈະສາມາດສະໜອງຂໍ້ມູນການພະຍາກອນອາກາດທີ່ຊັດເຈນ ແລະ ການແຈ້ງເຕືອນໄພເພື່ອກະກຽມຮັບມືຢ່າງທັນການ ແລະ ທັງຈະເປັນການຊ່ວຍຫຼຸດຜ່ອນຜົນກະທົບ ແລະ ຜົນເສຍຫາຍໃຫ້ເບົາບາງລົງ. ທ່ານ ໂພໄຊ ໄຂຄໍາພິທູນ, ຮອງລັດຖະມົນຕີ ກະຊວງການຕ່າງປະເທດ ກ່າວວ່າ: ການຊ່ວຍເຫຼືອຂອງ ລັດຖະບານ ແລະ ປະຊາຊົນຍີ່ປຸ່ນ ໃນໄລຍະຜ່ານມາ, ໄດ້ປະກອບສ່ວນສໍາຄັນເຂົ້າໃນການພັດທະນາ ເສດຖະກິດ-ສັງຄົມ ຂອງ ສປປ ລາວ

ດຣ. ຄຳໃສ ເດດລືໄຊ ຮອງຫົວໜ້າກົມປີ່ນປົວ ແລະ ຟື້ນຟູໜ້າທີ່ການ, ກະຊວງສາທາລະນະສຸກ ກ່າວວ່າ ປັດຈຸບັນຫຼາຍບ້ານກາຍເປັນບ້ານແດງ ແລະບ້ານທີ່ເປັນບ້ານແດງແມ່ນຈະມີປ້າຍບອກ ເພື່ອໃຫ້ປະຊາຊົນຄົນອື່ນຮັບຊາບວ່າ ນີ້ແມ່ນບ້ານແດງພ້ອມທັງມີເຈົ້າໜ້າທີ່ເວນຍາມຕະຫຼອດ 24 ຊົ່ວໂມງ.

ໂດຍທົ່ວໄປແລ້ວ ເມື່ອບ້ານໃດໜຶ່ງຖືກກໍານົດວ່າເປັນບ້ານແດງ ບ້ານດັ່ງກ່າວຈະຕ້ອງໄດ້ປະຕິບັດມາດຕະການປິດບ້ານ ບໍ່ໃຫ້ຄົນພາຍນອກເຂົ້າມາໃນບ້ານ ເພື່ອປ້ອງກັນການແຜ່ເຊື້ອ ຍົກເວັ້ນທິມແພດ ທີ່ມາເຮັດວຽກກ່ຽວຂ້ອງກັບພະຍາດໂຄວິດ 19. ສວ່ນປະຊາຊົນທຸກຄົນທີ່ຢູ່ບ້ານແດງ ຄວນປະຕິບັດເຊັ່ນນີ້:
1 ຕ້ອງໄດ້ພ້ອມໃຈກັນ ຢູ່ເຮືອນ ບໍ່ອອກຈາກບ້ານ ແລະ ບໍ່ຄົບຄົນອື່ນ.
2 ບໍ່ອະນຸຍາດໃຫ້ການຈັດງານສັງສັນ ຊຸມແຊວໃດໆ.

3 ຊາວບ້ານ ບ້ານແດງ ແມ່ນຕ້ອງໄດ້ປົກປ້ອງຕົນເອງເປັນພິເສດ ແລະ ເຂັ້ມງວດ ໂດຍການໃສ່ຜ້າປິດປາກ-ດັງ, ໝັ່ນລ້າງມື, ຢູ່ຫ່າງກັນ ຢ່າງໜ້ອຍ 1 ແມັດຂື້ນໄປ ແລະ ສະມາຊິກຄອບຄົວ ຄວນແຍກກັນກິນເຂົ້າ ກິນໃຜກິນມັນ.
4 ໃຫ້ການຈັດຕັ້ງບ້ານຮັບຜິດຊອບໃນການຊ່ວຍຈັດຊື້ເຄື່ອງອຸປະໂພກ, ບໍລິໂພກໃຫ້ແກ່ຄອບຄົວ ຫຼື ເຮືອນທີ່ມີຜູ້ຕິດເຊື້ອ
5 ຖ້າມີພະນັກງານ-ລັດຖະກອນ ສັງກັດຢູ່ບ້ານແດງ ດີທີ່ສຸດ ຄວນຢຸດໄປເຮັດວຽກຢູ່ຫ້ອງການຊົ່ວຄາວ ແຕ່ເລືອກວິທີເຮັດວຽກຢູ່ເຮືອນແທນ. ສໍາລັບບາງໜ້າວຽກທີ່ຂາດບໍ່ໄດ້ ຕ້ອງເຮັດຢູ່ຫ້ອງການເທົ່ານັ້ນ ກໍ່ຄວນຈະໄດ້ແຈ້ງນາຍບ້ານ ເພື່ອຂໍເອກກະສານຢັ້ງຢືນເພື່ອ ອອກ-ເຂົ້າບ້ານ ຫຼື ມີເອກະສານຢັ້ງຢືນຈາກຫ້ອງການ ເພີ່ມເຕີມຍິ່ງເດີ.

6 ປະຊາຊົນບ້ານແດງ ທີ່ມີສວ່ນພົວພັນໄກ້ຊິດ ກັບຄົນຕິດເຊື້ອ ກໍ່ຄວນໄດ້ກະກຽມທາມລາຍຂອງຕົນ ໃຫ້ຈະແຈ້ງ ແລະ ຖືກຕ້ອງ ເພື່ອການສອບສວນຂອງແພດ ຈະບໍ່ໃຊ້ເວລາຫຼາຍ ຈາກນັ້ນ ກໍ່ຕຽມຄວາມພ້ອມ ເພື່ອໃຫ້ແພດເກັບຕົວຢ່າງໄປກວດ. ໃນຂະນະດຽວກັນ ກໍ່່ຕ້ອງແຍກຕົວຈາກຄົນອື່ນ ໃຫ້ຄົບ 2 ອາທິດ ເຖິງວ່າຈະໄດ້ຮັບການຢັ້ງຢືນການກວດວ່າເປັນຜົນລົບກໍ່ຕາມ.
7 ປະຊາຊົນບ້ານແດງ ທີ່ຍັງບໍ່ທັນໄດ້ສັກວັກຊິນ ກໍ່ກຽມຕົວເອງ ເພື່ອແພດຈະໄດ້ເຄື່ອນທີ່ໄປສັກວັກຊິນຢູ່ກັບບ້ານເລີຍ.

8 ສໍາລັບຄອບຄົວຂອງຄົນຕິດເຊື້ອ ທີ່ຢູ່ບ້ານແດງ ຄວນໄດ້ທໍາຄວາມສະອາດ ແລະ ຂ້າເຊື້ອຢູ່ໃນເຮືອນຕົນເອງ, ໂດຍການເຊັດຖູດ້ວຍນໍ້າຢາຂ້າເຊື້ອ. ໃນຈຸດທີ່ບໍ່ສາມາດເຊັດຖູໄດ້ ສາມາດສີດຜົ່ນຢາຂ້າເຊື້ອໄດ້ ແຕ່ສະມາຊິກທັງໝົດໃນຄອບຄົວ ຕ້ອງອອກມາລໍຖ້າຢູ່ເດີ່ນເຮືອນ ແລະ ລໍຖ້າຈົນກວ່າການສີດຜົ່ນນັ້ນ ເຫີຍແຫ້ງ ຈຶ່ງເຂົ້າໄປໃນເຮືອນ ເພື່ອຫຼີກເວັ້ນ ຜົນກະທົບຂອງຢາຂ້າເຊື້ອຕໍ່ຜິວໜັງ ແລະ ລະບົບຫາຍໃຈຂອງທຸກຄົນ.
9 ບ້ານແດງ ຈະກາຍເປັນບ້ານເຫຼືອງ ໃນເມື່ອການປະຕິບັດມາດຕະການປິດບ້ານໄດ້ຄົບ 14 ວັນ ແລະ ບໍ່ມີເຫດການແຜ່ເຊື້ອໃນບ້ານດັ່ງກ່າວໃນເວລາ 14 ວັນດັ່ງກ່າວ.